Ганаровае званне “Культурная сталіца — 2025” атрымаў горад Іванава. Эстафету яму напрыканцы 2024 года перадалі Бялынічы.

НАЎЗДАГОН 

Урачыстую цырымонію правялі ў раённым Цэнтры культуры. Гасцей сустракала навагодняя інтэрактыўная пляцоўка з касцюміраванымі персанажамі і канцэртна-забаўляльнай праграмай. Тут жа прайшоў майстар-клас па выцінанцы, якую нядаўна прызналі элементам нематэрыяльнай культурнай спадчыны ЮНЕСКА. Магілёўскі абласны тэатр лялек прадставіў дзіцячы спектакль. Адбылася творчая сустрэча з Наталляй Навоенка, мастаком-пастаноўшчыкам новага фільма “Чорны замак” па рамане У. Караткевіча. Працавалі экспазіцыі “Крыніца каштоўнасцей — гістарычная памяць”, “Стагоддзе беларускага кіно”, а таксама выстава работ удзельнікаў міжнароднага пленэру “Вобраз Радзімы ў выяўленчым мастацтве”. 

Ганаровае званне “Культурная сталіца” Бялынічы годна неслі на працягу ўсяго 2024-га. У райцэнтры арганізавалі дзясяткі творчых праектаў, у тым ліку імпрэзы з вядомымі дзеячамі мастацтваў, выставы, акцыі і фестывалі, паказы прэм’ерных фільмаў і спектакляў, канцэрты. 

— Для Бялынічаў мінулы год быў вельмі насычаным, — адзначыла старшыня райвыканкама Вольга Прыстромская. — Дзякуй за гэта нашым артыстам і творчым людзям. У іх была выдатная магчымасць паказаць, на што мы здольныя, расказаць пра сябе і сваю родную зямлю. Статус культурнай сталіцы ўплывае на развіццё не толькі канкрэтнага населенага пункта, але і ўсяго рэгіёна. 

ШЧЫРА ЗАПРАШАЕМ

Па словах старшыні Іванаўскага раённага Савета дэпутатаў Рыгора Сысы, рашэнне ўдзельнічаць у барацьбе за званне “Культурная сталіца — 2025” не прымаецца спантанна. Для гэтага павінен быць рэсурс, які назапашваецца дзесяцігоддзямі. 

— Культуру і традыцыі Іванаўскага раёна немагчыма паказаць нават за тры дні, — падкрэсліў Рыгор Сыса. — У нас 25 калектываў са званнямі народнага, узорнага, заслужанага. Кожны можа даць паўнавартасны канцэрт. На працягу 2025 года ўсім забяспечым магчымасць раскрыцца і прадставіць тое, чым яны валодаюць і што ўмеюць. Мы рады прымаць гасцей. Гэта будзе ўмацоўваць і ўзбагачаць наш патэнцыял. 

Як адзначыў старшыня Іванаўскага раённага Савета дэпутатаў, духоўнасць і культура павінны ісці ад сэрца і перадавацца з пакалення ў пакаленне. У кожнай мясцовасці фарміруецца свой асаблівы культурны код. Іванаву таксама ёсць чым ганарыцца. 

— Наша гордасць — спадчына роду Дастаеўскіх, вёска Дастоева. Хочаце даведацца, адкуль пайшло гэтае прозвішча, прыязджайце ў Іванаўскі раён. Тут багата матэрыялаў, якія раскрыюць гісторыю роду. Імя мастака Напалеона Орды вядомае ва ўсім свеце, а гэта ўраджэнец нашай вёскі Варацэвічы. Па яго карцінах аднаўляюцца многія гісторыка-культурныя каштоўнасці ў краіне. Адзіная ў Беларусі школа бондарства таксама працуе ў нас. Вось толькі малая частка нашых скарбаў, — запрашае ў госці Рыгор Сыса. 

ШЫРОКАЕ ПАНЯЦЦЕ 

Начальнік упраўлення культуры і народнай творчасці Міністэрства культуры Ірына Карповіч на ўрачыстай цырымоніі ў Бялынічах заявіла, што рэспубліканская акцыя “Культурная сталіца” дазваляе шырока прэзентаваць творчыя здабыткі, мінулае раёнаў. 

— Кожны рэгіён мае глыбокую каранёвую сістэму ў традыцыях, культуры, мастацтве, гісторыі, — сказала Ірына Карповіч. — Каб гэта шырока прадэманстраваць гасцям і жыхарам нашай краіны, неабходны сапраўды вызначальны фактар. І такім фактарам стала рэспубліканская акцыя “Культурная сталіца”. Рэгіён, якому пашчасціла заваяваць тытул, стараецца, каб пра яго даведаліся як мага больш: пра таленавітых людзей, гісторыю, традыцыі, асаблівасці. Разам з тым культура — шырокае паняцце. Таму да гэтага статусу падцягваюцца ўсе астатнія сферы, уключаючы жыллёва-камунальную і сельскую гаспадарку. Як вядома, толькі разам, усім светам, можна зрабіць сапраўды годныя справы. 

ЯРКІ АКОРД 

Намеснік старшыні Магілёўскага аблвыканкама Алег Сцельмашок нагадаў, што ганаровае званне “Культурная сталіца” прысуджаецца беларускім населеным пунктам з 2010 года. У Бялынічах на працягу 2024-га прайшло больш за 150 розных праграм. Іх гледачамі сталі звыш 10 тысяч чалавек. Падчас мерапрыемстваў Магілёўшчына прэзентавала шэраг сваіх культурных брэндаў: Міжнародны маладзёжны тэатральны форум “M.@rt.кантакт”, Міжнародны фестываль дзіцячай творчасці “Залатая пчолка”, рэспубліканскае свята “Купалле” (“Александрыя збірае сяброў”). 

Цырымонію перадачы звання “Культурная сталіца” завяршыў вялікі канцэрт майстроў мастацтваў з Мінска, Магілёва, Бялынічаў, Іванава. Цікавая рэжысура і яркія выступленні юных выканаўцаў ды самадзейных калектываў з навучальных устаноў Магілёўскай вобласці зрабілі свята прыгожым і душэўным. 

Віктар ГАЎРЫШ 

Фота аўтара