Кінастужка “Канстытуцыя Рэспублікі Беларусь” — твор, які прымусіць задумацца.

Паказы нацыянальнага фільма стартуюць 5 сакавіка па ўсёй краіне.

Галоўныя падзеі, звязаныя з прэм’ерай, разгорнуцца ў сталічным кінатэатры “Піянер”. Перад сеансам у фае зладзяць інтэрактыўную праграму для гледачоў, якая дазволіць яшчэ больш паглыбіцца ў тэму.

У той жа дзень першыя паказы адбудуцца ва ўсіх рэгіёнах і дадуць магчымасць кожнаму маладому беларусу па-новаму зірнуць на Асноўны Закон сваёй Радзімы.

Карціна ў змяшанай форме пад назвай “Канстытуцыя Рэспублікі Беларусь” створана Нацыянальнай кінастудыяй “Беларусьфільм” у 2025 годзе. Унікальны праект Яўгена Шлемянкова разлічаны на падлеткавую і моладзевую аўдыторыю. Замест традыцыйнага выкладу артыкулаў і раздзелаў, рэжысёр абраў наватарскі падыход.

Фільм не проста распавядае пра структуру і змест Асноўнага Закона, а пераносіць гледача ў захапляльную гісторыю, якая на ўласным вопыце галоўнага героя дэманструе, наколькі важна ведаць і выконваць Канстытуцыю ў штодзённасці.

У цэнтры сюжэта — Макс, тыповы сучасны падлетак, чыё жыццё непарыўна звязана са светам камп’ютарных гульняў і інтэрнэту. Паглыбіўшыся ў кіберрэальнасць, хлопец знаёміцца з электроннай памочніцай Алінай, што абяцае славу і багацце. Паверыўшы ёй, Макс пачынае рабіць дзіўныя і нават супрацьзаконныя ўчынкі. На яго шляху паўстае Правабот — электронны захавальнік Канстытуцыі, які спрабуе зберагчы юнака ад неабдуманых крокаў…

Гісторыя развіваецца, бы сапраўдны дэтэктыў, трымаючы ў напружанні да самага фіналу. Нягледзячы на нечаканасць, канцоўка нясе грунтоўны павучальны сэнс.

kultura-info.by