Калі навагоднія святкі набліжаюцца, асаблівы густ у паветры напаўняюць яркія ідэі і рукамі створаныя цуды народных майстроў. У Мінску з 19 снежня па 11 студзеня праходзіць штогадовая рэспубліканская выстава народнай творчасці “Калядныя ўзоры”.

У гэтым годзе Магілёўскую вобласць прадстаўляюць 75 майстроў, якія сваімі рукамі ствараюць унікальныя творы з лазы, саломы, тэкстылю, керамікі, дрэва, металу і нават ватных матэрыялаў. Кожная работа – гэта вынік штодзённай працы, натхнення і любові да народных традыцый.

— Гэта самая прэстыжная выстава для ўсіх майстроў, бо кожны імкнецца прадставіць нешта новае, унікальнае. У гэтым годзе ў нас прынялі ўдзел 75 майстроў – гэта вельмі ганарова і паказвае высокі ўзровень развіцця народных рамёстваў у рэгіёне, — адзначала Наталля Даменікава, народны майстар і метадыст Магілёўскага абласнога метадычнага цэнтра народнай творчасці і культурна-асветнай работы.

У экспазіцыі можна ўбачыць шырокі спектр работ: тэкстыльныя куклы, выцінанкі, керамічны посуд і ўнікальныя вырабы з саломы. Майстры прадставілі свае новыя работы, у якіх спалучаюцца традыцыі і сучаснасць. У прыватнасці, Наталля Вітольдаўна стварыла новую работу – “Каляды”, што стала вынікам яе эксперыментаў і натхнення, а яе дачка Анна прадставіла калекцыю ангелаў – сімвалаў свету і веры.

Выстава “Калядныя ўзоры” – гэта магчымасць не толькі прадэманстраваць свае навыкі, але і атрымаць прызнанне, натхненне і новыя ідэі для далейшага развіцця. Майстры з Магілёўскай вобласці з гонарам паказваюць, што традыцыі жывуць, развіваюцца і знаходзяць сваё месца ў сучасным свеце.

Няхай жа нашы майстры і далей натхняюцца на стварэнне цудаў, а іх работы прыносяць радасць і ўтульнасць у кожны дом у час свят.

Крысціна БАШАРЫМАВА, вядучы рэдактар
УК “Магілёўскі абласны метадычны цэнтр НТ і КАР”