У Нацыянальным гісторыка-культурным музеі-запаведніку "Нясвіж" адкрываецца ўнікальная выстава зброі "Гонар. Доблесць. Годнасць".

31 кастрычніка ў Вялікай выставачнай зале Палацавага ансамбля адбудзецца ўрачыстае адкрыццё новай выставы, прысвечанай гісторыі зброі як сімвала ўлады, статусу і мастацтва. Экспазіцыя "Гонар. Доблесць. Годнасць" уяўляе сабой выбітныя ўзоры параднай і паляўнічай зброі, сабраныя прыватным калекцыянерам Анатолем Грышуком.

Як паведаміла спецыяліст па сувязях з грамадскасцю музея-запаведніка "Нясвіж" Вольга Галубовіч, выстава ахоплівае перыяд з сярэдзіны XIX да сярэдзіны XX стагоддзя і запрашае наведвальнікаў акунуцца ў багатую і шматгранную гісторыю зброі.

У экспазіцыі прадстаўлены ўзоры афіцэрскай параднай зброі, камзольныя і ведамасныя шпагі, масонскія рытуальныя мячы, а таксама рэдкая і экзатычная зброя з розных краін свету. Адмысловае месца займае па-майстэрску ўпрыгожаная паляўнічая зброя, сведчанне майстэрства і памяці аб слаўных трафеях.

— Галоўнай славутасцю выставы стане інсталяцыя — фігура вершніка на кані, закаванага ў зіхатлівы даспех Крылатага гусара Вялікага Княства Літоўскага, якая эфектна перадае дух эпохі, — расказала Вольга Галубовіч. — Госці змогуць не толькі пабачыць унікальныя творы мастацтва, але і паўдзельнічаць у інтэрактывах і пазнаёміцца з тактыльнымі экспазіцыямі.

Для аматараў гісторыі і ваеннага мастацтва падрыхтаваны тэматычныя зоны: магчымасць прымераць сярэднявечны даспех, адчуць яго цяжар і зрабіць памятныя фатаграфіі разам з фігурай Мікалая Радзівіла Сіроткі — аднаго са знакамітых уладальнікаў гэтай калекцыі зброі.

Выстава "Гонар. Доблесць. Годнасць" будзе працаваць па 31 кастрычніка 2026 года.

kultura-info.by