Культура мовы як маркер духоўна-маральнага стану грамадства: выстава актуальных студэнцкіх плакатаў адкрылася ў Гродне. 

Правядзенне мерапрыемстваў па павышэнні культуры вусных і пісьмовых дзяржаўных моў — адзін з механізмаў рэалізацыі Канцэпцыі развіцця нацыянальнай культурнай прасторы ва ўсіх сферах жыцця грамадства на 2024—2026 гады. Дакумент, распрацаваны на аснове міжгаліновага прынцыпу і арыентаваны на прадстаўнікоў усіх слаёў грамадства і ўзроставых груп насельніцтва нашай краіны, быў зацверджаны Пастановай Савета міністраў напрыканцы 2023-га. 

Практычна тым часам на педагагічным факультэце Гродзенскага дзяржаўнага ўніверсітэта імя Янкі Купалы ўзнікла цікавая моладзевая ініцыятыва. Праект “Стоп мат!”, які ажыццяўляецца пад кіраўніцтвам дацэнта кафедры філасофіі Аляксандры Дубравінай другі год запар, атрымаў шырокі водгук у грамадскасці. 

— Ён актуалізуе важную сацыяльную праблему культуры мовы, як маркера духоўна-маральнага стану грамадства, — адзначае Аляксандра Міхайлаўна. — І выяўляе культуру мовы як фактар нацыянальнай бяспекі. 

Сёлета выстава студэнцкіх плакатаў, прымеркаваная да Міжнароднага дня барацьбы з нецэнзурнай лексікай, распачала работу 11 лютага. Падчас цырымоніі адкрыцця адбыліся выступленні гродзенскіх паэтаў, прайшоў конкурс на найлепшы плакат — пераможцаў вызначалі па выніках галасавання гледачоў. 

— Самыя ўдалыя работы мяркуем шырока растыражаваць як сацыяльную рэкламу, — дзеліцца планамі Аляксандра Дубравіна.

Таксама ў перспектыве — паказаць плакаты найбольшай колькасці моладзі. Наведаць выставу пад кіраўніцтвам куратараў маюць намер навучэнцы розных устаноў адукацыі Гродна. Разгарнуць экспазіцыю мусяць і ў іншых навучальных установах горада.