У сферы культуры працуюць сапраўдныя патрыёты. Пра гэта заявіў міністр культуры Рэспублікі Беларусь Анатолій Маркевіч на семінары для рэзерву кіруючых работнікаў галіны. Мерапрыемства адбылося на базе Мінскага дзяржаўнага мастацкага каледжа імя А.К. Глебава. 

Па словах міністра, беларуская культура і людзі, што ствараюць яе сваёй працай, з’яўляюцца буферам для негатыву, які спрабуюць закінуць у краіну звонку. Адмысловае месца займаюць тыя, хто гатовы ў любы момант выкарыстаць свае кіраўніцкія навыкі там, дзе яны запатрабаваныя ў найвялікай ступені. Не кожны здольны наважыцца на змену месца жыхарства, паступіцца ўласнымі інтарэсамі і камфортам дзеля справы. Але менавіта такія людзі сёння фарміруюць спецыяльную групу рэзерву кадраў Міністэрства культуры, падкрэсліў кіраўнік галіны. 

Спецыяльная група рэзерву кадраў для разгляду кандыдатаў на кіруючыя пасады сфарміравана ў сакавіку ў адпаведнасці з загадам Міністэрства культуры. 

У ёй — 32 рэзервісты з ліку работнікаў арганізацый сферы культуры, упраўленняў, аддзелаў, сектараў з усіх рэгіёнаў рэспублікі, якія дасягнулі найлепшых вынікаў у рабоце і маюць здольнасці да кіраўніцкай дзейнасці. Сярод іх 15 кіраўнікоў, 6 намеснікаў, 11 дзяржаўных служачых і спецыялістаў. 

У адкрытым дыялогу Анатолій Маркевіч падзяліўся асабістым досведам, адказаў на пытанні рэзервістаў. У прыватнасці міністр распавёў аб сваім бачанні перспектыў акадэмічнай музычнай адукацыі, нестандартных формах арганізацыі прафесійнай падрыхтоўкі па творчых спецыяльнасцях, аплаце працы кіраўнікоў і спецыялістаў сферы культуры. 

Таксама падчас семінара па тэме “Аб ролі кіраўніка ў фарміраванні сацыяльна-псіхалагічнага клімату ў працоўным калектыве” выступіў дэпутат Палаты прадстаўнікоў Нацыянальнага сходу Рэспублікі Беларусь, дырэктар Нацыянальнай бібліятэкі Беларусі Вадзім Гігін. 

Аб дзейнасці грамадскіх аб’яднанняў у Рэспубліцы Беларусь удзельнікам семінара расказала старшыня Мінскай гарадской арганізацыі РГА “Белая Русь” Наталля Воранава.