Беларускі дзяржаўны цырк ярка ўварваўся ў новы сезон з праграмай “Цыркалета”. У ёй удзельнічаюць любімыя айчынныя артысты і запрошаныя госці з Расіі і Манголіі. На арэне дэманструюць складаныя акрабатычныя нумары і атракцыёны з дзікімі жывёламі. Чым яшчэ будуць здзіўляць публіку?
Набыўшы квіток на новае шоу Белдзяржцырка, вы аўтаматычна адпраўляецеся ў імправізаваны адпачынак. Усё пачынаецца з таго, што вядучы Дзмітрый Аляксандраў забараняе любыя трэніроўкі, выступленні і раіць артыстам спакаваць багаж. Кожны бярэ з сабой самае неабходнае: гіры, кеглі, абручы, музычныя інструменты і нават жывёл! Першай на “перон” прыбудзе Лілія Максіменка з вялікімі чамаданамі і сабачкамі. І адразу падорыць публіцы зарад мілаты і бадзёрасці. Далей сваёй моцай уразіць асілак Багдан Казакоў, які ў якасці размінкі пагне металічную палку зубамі, а пасля ўзваліць на спіну сапраўднае піяніна і з лёгкасцю пранясе яго па арэне. На канструкцыі ў выглядзе скрыпічнага ключа ўзляціць пад купал цырка беларуская паветраная гімнастка Анастасія Каваленка — і гледачы замруць ад страху і захаплення.
ХАТНЯЯ АТМАСФЕРА
Завершыць першае аддзяленне з’яўленне на манежы яркіх птушак. Як кажа дырэктар цырка Уладзімір Шабан, асаблівую цікавасць выклікаюць нумары з папугаямі. Таму ў Мінск другі раз запрасілі расійскага артыста Алега Хоціма. Па яго словах, сакрэт поспеху “Шоу папугаяў” — правільна падабраныя трукі. Дрэсіроўшчык ніколі не ідзе супраць волі сваіх выхаванцаў. З імі трэба знаходзіць кампраміс і пры дапамозе пачастункаў і хітрасці дамагацца жаданага выніку. Праз такі падыход яго ўлюбёнка Мальвіна без праблем катаецца на ровары, роліках і самакаце, гуляе ў мячык, куляецца, ляжыць на спіне, стаіць на галаве.
— Дзякую за магчымасць чарговы раз выступаць у Белдзяржцырку. Тут я адчуваю цёплую хатнюю атмасферу. Для мяне працаваць з птушкамі — задавальненне. Я атрымліваю асалоду ад кожнага праведзенага моманту на манежы, — падкрэслівае Алег Хоцім. — Са сваімі падапечнымі я праводжу шмат часу, і побач заўсёды ёсць асістэнт, які назірае за імі ў рэжыме 24 на 7. Мае 12 папугаяў не размаўляюць, таму што жывуць у зграі. Затое яны высока лётаюць. Сваё шоу я заўсёды завяршаю своеасаблівым “кругам пашаны”, калі некалькі птушак узлятаюць пад купал цырка.
ТАНГА З ТЫГРАМІ
У праграме “Цыркалета” таксама задзейнічаны кошкі, сабакі, коні. Але больш за ўсё гледачы чакаюць з’яўлення на арэне тыграў. Гэтым разам знакаміты атракцыён з удзелам усурыйскіх вялікіх кошак прывезлі заслужаныя артысты Расіі Артур і Карына Багдасаравы. Яны ўжо наведвалі наш цырк да рэстаўрацыі і цяпер уражаны яго зменам:
— Мы з сястрой любім Мінск і з радасцю прыехалі сюды зноў. Беларускі глядач прывык да якасных цыркавых праграм, што абавязвае адпавядаць гэтаму патрабаванню. Не ва ўсіх краінах ёсць стацыянарныя будынкі, таму Беларусь выгадна адрозніваецца ў гэтым плане ад астатніх. У вас ёсць такі прыгожы храм цыркавога мастацтва, які наведвае велізарная колькасць людзей. І я прыемна здзіўлены, што ўсё падтрымліваецца ў ідэальным стане. Адчуванне, што рамонт скончылі ўчора, — дзеліцца эмоцыямі Артур Багдасараў. — Мы плануем запрасіць усіх ахвотных на адкрытыя рэпетыцыі, каб расказаць пра нашы прынцыпы працы з дзікімі жывёламі і этычнасць метадаў дрэсіроўкі.
Кіраўнікі нумара “Тыгры-шоу” Карына і Артур Багдасаравы дадалі, што прывезлі зусім новы варыянт, які бачылі толькі ў Маскве і Казані. На манежы іх падапечныя паслухмяна становяцца на заднія лапы і пераскокваюць праз кольцы. Пад рытмы танга дрэсіроўшчыкі кружаць вакол вялікіх котак і нават танчаць з імі! Цікава, што разам з дарослымі жывёламі прыехала і тыграня, у якога пакуль няма імя. Артысты не выключаюць, што менавіта падчас знаходжання на беларускай зямлі яны абяруць найлепшае.
РЫХТАВАЛІСЯ ТРЫ ГАДЫ
Апошнім дзеяннем праграмы стане нумар “Акрабаты на падвойным трампліне”, які пакажуць атлеты з Манголіі. У ім задзейнічаны 10 чалавек, якія працуюць без страхоўкі: яны выконваюць складаныя трукі — падвойнае і патройнае сальта, а таксама будуюць калоны з некалькіх артыстаў.
— Вялікі дзякуй беларускаму боку за запрашэнне. Наша трупа тут упершыню, наогул для нас гэта першыя замежныя гастролі. Плануем выступіць на III Мінскім міжнародным фестывалі цыркавога мастацтва ў верасні, — адзначае кіраўнік Эрдэне Нергуй. — Свой нумар мы рэпетавалі амаль тры гады. І ўпершыню прадстаўляем яе на такой вялікай арэне.
Акунуцца ў свет цыркавога чараўніцтва і маляўнічых летніх уражанняў можна з 25 мая па 4 жніўня. Адчуванне, што наведаў самы незвычайны курорт, — гарантаванае!
Настасся ЮРКЕВІЧ
Фота Ульяны КАСЦЮНІНАЙ
