Пад эгідай Гродзенскага абласнога праекта "Вяселле па беларускім канонам" у аг. Мураваная Ашмянка адбылося свята добрага суседства "Землякі" або "Вяселле на конным двары".

У аснову мерапрыемства лягла гісторыя пра тое, як калісьці ў гэтым гістарычным месцы жыццё было непарыўна звязана з коньмі.

Коні былі сімвалам дастатку, хуткасці і сувязі паміж людзьмі. Менавіта на лепшых конях адпраўляліся сваты ў суседнія вёскі і гарады.

Вясельны цягнік, на чале якога заўсёды ехаў жаніх на самым прыгожым кані, быў першым "мостам" паміж дзвюма сем'ямі, паміж дзвюма суседскімі абшчынамі.

Свята ўзнавіла гэты шлях: ад ушаноўвання каня-працаўніка да стварэння новай сям'і, якая становіцца асновай добрасуседскіх адносін.

Падчас вяселля ўзнагародзілі і мясцовых жыхароў за лепшы двор, адзначылі лепшых суседзей, даўгажыхароў, шматдзетных.

Сакрэтам доўгага і шчаслівага сумеснага жыцця падзялілася пара, якая ў гэтым годзе святкуе 50-гадовы юбілей вяселля.

Сабраліся суседзі, гулялі ўсёй вёскай!

Алеся МАЛІНОЎСКАЯ, загадчык аддзела
метадычнай работы ДУК "Ашмянскі РЦК"