Напярэдадні прафесійнага свята – Дня работнікаў культуры – урачыстае пасяджэнне прайшло ў Міністэрстве культуры Рэспублікі Беларусь. Да ўдзелу ў ім былі запрошаны работнікі галіны, якія дабіліся за мінулы год высокіх паказчыкаў у працы.
З прывітальным словам да прысутных звярнуўся Міністр культуры Рэспублікі Беларусь Руслан Чарнецкі.
Руслан Іосіфавіч павіншаваў калег са святам і адзначыў, што іншым разам штодзённая праца культработнікаў амаль незаўважна старонняму воку: глядач бачыць толькі канчатковы вынік, нават не задумваючыся пра тое, колькі было прыкладзена намаганняў.
— Работнікі культуры — гэта захавальнікі культурнай спадчыны і традыцый нашага народа, — адзначыў Міністр. — У сваёй творчасці вы ўвасабляеце сапраўдныя духоўныя каштоўнасці, прыгажосць роднай зямлі і выключнасць беларускай ідэнтычнасці. Дзяуцючы вашай штодзённай працы і прафесіяналізму айчынная культура развіваецца не толькі ў сталіцы, але і ў самых аддаленых кутках нашай Радзімы.
Руслан Чарнецкі ўручыў высокія ўзнагароды. Падзяка Кіраўніка Адміністрацыі Прэзідэнта Рэспублікі Беларусь аб’яўлена настаўніку харэаграфіі дзяржаўнай установы адукацыі “Дзіцячая харэаграфічная школа мастацтваў г. Гомеля” Сняжане Гулевіч і генеральнаму дырэктару КУП “Мінаблкінавідэапракат” Таццяне Дарашкевіч. Падзяка Прэм’ер-міністра Рэспублікі Беларусь за шматгадовую плённую працу, высокі прафесіяналізм, значны асабісты ўклад у развіццё і захаванне нацыянальнай культуры ўручана намесніку галоўнага захавальніка фондаў установы “Беларускі дзяржаўны музей гісторыі Вялікай Айчыннай вайны” Святлане Прыбыш, загадчыку сектара зводнага электроннага каталога дзяржаўнай установы “Нацыянальная бібліятэка Беларусі” Зоі Пятроўскай і галоўнаму мастаку дзяржаўнай установы “Заслужаны калектыў Рэспублікі Беларусь «Беларускі дзяржаўны тэатр лялек»” Таццяне Нерсісян.
Ганаровыя граматы, Граматы Міністэрства культуры Рэспублікі Беларусь і Падзякі Міністра атрымалі супрацоўнікі апарата ўпраўлення.
На гэтым ушаноўванне лепшых работнікаў сферы не скончылася. Наперадзе яшчэ не адно ўрачыстае мерапрыемства — на рэспубліканскім узроўні, у раённых і абласных цэнтрах рэспублікі, працоўных калектывах.
Ірына СТАНКЕВІЧ. Фота Ангеліны САРОКА
