XXXIV Міжнародны фестываль мастацтваў “Славянскі базар у Віцебску” стартуе 10 ліпеня. Адпаведны дакумент Аляксандр Лукашэнка падпісаў 1 красавіка.

Згодна з распараджэннем Прэзідэнта Рэспублікі Беларусь “Аб Міжнародным фестывалі мастацтваў «Славянскі базар у Віцебску»” № 54рп, сёлетняе свята пройдзе з 10 па 13 ліпеня. 

З улікам існай практыкі дзяржаўнай падтрымкі творчага форуму для яго арганізатараў і ўдзельнікаў прадугледжаны асобныя льготы і прэферэнцыі. У прыватнасці, з 4 па 20 ліпеня для гасцей фестывалю з 71 дзяржавы ўстаноўлены бязвізавы парадак уезду ў Беларусь, часовага знаходжання ў краіне і выезду з яе. 

Для бязвізавага перасячэння дзяржаўнай граніцы замежным грамадзянам трэба мець арыгінальны або электронны білет на мерапрыемствы фестывалю, што праходзяць у Летнім амфітэатры або ў канцэртнай зале “Віцебск”. Па адным арыгінальным або электронным білеце дапускаецца аднаразовы ўезд у Беларусь аднаго замежнага грамадзяніна, не пазнейшы за дату правядзення названага ў білеце мерапрыемства. 

Распараджэннем Кіраўніка дзяржавы таксама актуалізаваны склад арганізацыйнага камітэта Міжнароднага фестывалю мастацтваў “Славянскі базар у Віцебску”. Паводле дакумента, аргкамітэт узначаліць намеснік Прэм’ер-міністра Рэспублікі Беларусь Уладзімір Каранік. У якасці яго намеснікаў зацверджаны Аляксандр Субоцін, старшыня Віцебскага абласнога выканаўчага камітэта, і Руслан Чарнецкі, міністр культуры Рэспублікі Беларусь.