Беларускім дзяржаўным музеем гісторыі Вялікай Айчыннай вайны ўжо пяць гадоў паспяхова кіруе самы сапраўдны палкоўнік. Уладзімір Варапаеў, заслужаны артыст Рэспублікі Беларусь, больш за 36 гадоў прысвяціў службе ва Узброеных Сілах Рэспублікі Беларусь. Напярэдадні 23 лютага мы пагаварылі з ім аб патрыятызме, вернасці Радзіме і справе, асаблівасцях творчага шляху чалавека ў пагонах.
— Я адслужыў у войску ад звання радавога да палкоўніка, і ўвесь гэты час творчасць ішла са мной побач. Пасля вучобы на ваенна-дырыжорскім факультэце пры Маскоўскай дзяржаўнай двойчы ордэна Леніна кансерваторыі імя П.І. Чайкоўскага служыў на розных пасадах. Ад начальніка аркестра — ваеннага дырыжора да начальніка ансамбля, мастацкага кіраўніка і галоўнага дырыжора заслужанага калектыву Рэспублікі Беларусь “Акадэмічны ансамбль песні і танца Узброеных Сіл Рэспублікі Беларусь”.
Асноўная місія ваеннага дырыжора — асветніцтва.
Музыка не толькі падымае баявы дух воінаў, але і стварае асаблівую творчую атмасферу, якая аб’ядноўвае людзей.
За плячыма ў мяне і маіх калектываў — сотні канцэртаў, дзясяткі напісаных і выкананых твораў пра герояў Вялікай Айчыннай вайны і пра сённяшніх абаронцаў Айчыны.
Вялікая колькасць рэалізаваных патрыятычных праектаў — гэта і ёсць галоўная асаблівасць творчага чалавека ў пагонах. Цяпер, калі я працую, дакладней казаць, служу на пасадзе дырэктара, раблю ўсё, каб наш музей быў найлепшым не толькі ў Беларусі, але і за яе межамі. Гэта мая адказнасць, маё жыццё.
— Якія мэты ставіце перад сабой і калектывам музея?
— Сёлета па ўсёй краіне пройдуць мерапрыемствы, прысвечаныя 80-годдзю Перамогі савецкага народа ў Вялікай Айчыннай вайне. Перад музеем стаяць вельмі адказныя і важныя задачы. Нашы супрацоўнікі ўдзельнічаюць практычна ва ўсіх значных патрыятычных праектах як у музеі, так і за яго сценамі. Мы шукаем і ўкараняем новыя формы работы з наведвальнікамі.
Адна з асноўных задач у нашай дзейнасці — праца з падрастаючым пакаленнем.
Таму асаблівая ўвага засяроджана на такіх формах работы, якія дапамагаюць асэнсаванаму ўспрыманню гістарычных ведаў, абуджаюць цікавасць у дзяцей і юнацтва да культурна-гістарычнай спадчыны краіны. Гэта дазваляе вырашаць не толькі паўсядзённыя прафесійныя, але і глабальныя дзяржаўныя задачы, забяспечваць на практыцы пераемнасць пакаленняў і захаванне гістарычнай памяці, нацыянальных традыцый і культурных кодаў.
Для папулярызацыі подзвігу беларускага народа намі падрыхтавана абноўленая экспазіцыя перасоўнага музея ў рамках патрыятычнай акцыі “Наш абавязак — памятаць!”. Яна створана на аснове фондавых матэрыялаў. Гэта сюжэтныя фатаграфіі, копіі дакументаў, плакатаў, рэпрадукцыі карцін, фотапартрэты Герояў Савецкага Саюза — беларусаў і воінаў іншых нацыянальнасцяў СССР. Інтэрактыўны сэнсарны экран “Памяць” прадстаўляе сучасныя матэрыялы па тэме “Генацыд беларускага народа ў гады Вялікай Айчыннай вайны”.
А на аб’ёмнай карце прадстаўлена 36 населеных пунктаў Беларусі, узнагароджаных вымпелам “За мужнасць і стойкасць у гады Вялікай Айчыннай вайны”. Перасоўны музей паказаў сябе як эфектыўная форма работы, яго дзейнасць будзе прадоўжана.
— Якія паказчыкі ўстановы вы лічыце самымі важнымі? Як удаецца іх дасягаць?
— Беларускі дзяржаўны музей гісторыі Вялікай Айчыннай вайны паспяхова выконвае ўсе асноўныя паказчыкі сваёй дзейнасці. Прызнаннем нашай працы з’яўляецца званне “Музей года 2024”, якое мы атрымалі ў рамках XXII Рэспубліканскага турыстычнага конкурсу “Пазнай Беларусь”. У 2023-м Указам Прэзідэнта за дасягненне высокіх вынікаў у сферы сацыяльна-эканамічнага развіцця ўстанова была занесена на Рэспубліканскую дошку Гонару пераможцаў спаборніцтва за 2022 год. Нашымі асноўнымі задачамі з’яўляюцца якаснае правядзенне экскурсій і, вядома ж, прыцягненне наведвальнікаў.
Летась нас наведала больш за 583 тысячы чалавек.
Штомесяц нашы навуковыя супрацоўнікі праводзяць больш за 600 экскурсій, не лічачы квэстаў і іншых праграм. Гэта дазваляе ахопліваць аўдыторыю ўсіх узростаў і павышаць узровень уцягнутасці насельніцтва ў вывучэнне гісторыі.
Гэты год, прысвечаны 80-годдзю Вялікай Перамогі, для нас асабліва значны. Плануем пашыраць адукацыйныя праграмы, арганізоўваць спецыяльныя выставы і мерапрыемствы, а таксама супрацоўнічаць з іншымі ўстановамі, каб прыцягнуць яшчэ больш наведвальнікаў і зрабіць максімальны ўнёсак у справу грамадзянска-патрыятычнага выхавання беларусаў.
Віктар ГАЎРЫШ
Фота Уладзіміра ШЛАПАКА
