Пасяджэнне калегіі Міністэрства культуры праходзіць сёння ў Нацыянальным мастацкім музеі. На парадку дня — арганізацыя працы музеяў і рэспубліканскага рэстаўрацыйнага цэнтра, меры па павышэнні ўласных даходаў і заработнай платы, выкананне паказчыкаў у музеях Віцебшчыны, дзейнасць Магілёўскага абласнога краязнаўчага музея па развіцці музейнай справы ў рэгіёне. 

Сярод дакладчыкаў — прадстаўнікі Міністэрства культуры і аблвыканкамаў, кіраўнікі вядучых музеяў краіны.

Аб праблемах і перспектывах у працы музеяў расказала начальнік упраўлення культуры і народнай творчасці Міністэрства культуры Ірына Карповіч. Па словах Ірыны Уладзіміраўны, айчынным установам удаецца падтрымліваць баланс паміж захаваннем традыцый і імкненнем да інавацый.

Асноўны паказчык у музейнай справе — колькасць наведванняў на тысячу чалавек. Летась ён перавыкананы і склаў 134,8% да гадавога плану. Гэтаму спрыяла праца па захаванні гістарычнай памяці, пашырэнні доступу да гістарычных і культурных каштоўнасцей, павышэнні турыстычнай прывабнасці.

Аб арганізацыі працы рэспубліканскага рэстаўрацыйнага цэнтра на базе Нацыянальнага мастацкага музея паведаміла генеральны дырэктар Ганна Конанава.

Аддзел навукова-рэстаўрацыйных майстэрняў ажыццяўляе рэстаўрацыю і кансервацыю алейнага і тэмпернага жывапісу, паліхромнай скульптуры, мэблі, металу і керамікі, тканін, старадрукаваных кніг і графікі. 

Установа не толькі рэстаўруе і кансервуе прадметы з уласных фондаў, але і аказвае паслугі іншым арганізацыям і фізічным асобам.

Высокі прафесіяналізм супрацоўнікаў і магутная матэрыяльна-тэхнічная база дазваляюць выдатна спраўляцца з самымі складанымі задачамі. Сярод заказчыкаў — музей "Замкавы комплекс "Мір" і іншыя скарбніцы нашай краіны.

Падчас пасяджэння калегіі Міністэрства культуры таксама выступілі прадстаўнікі дзяржаўных органаў, кіраўнікі рэспубліканскіх і рэгіянальных музеяў.

Начальнік упраўлення культуры Віцебскага аблвыканкама Пётр Падгурскі распавёў пра выкананне сацыяльна-эканамічных і прагнозных паказчыкаў музеямі вобласці.

Дырэктар Дзяржаўнага літаратурна-мемарыяльнага музея Якуба Коласа Ірына Мацяс і дырэктар Дзяржаўнага літаратурнага музея Янкі Купалы Ганна Галінская паведамілі аб мерах па павышэнні долі ўласных даходаў і павелічэнні заработнай платы.

Аб дзейнасці па развіцці музейнай справы ў рэгіёне расказаў дырэктар Магілёўскага абласнога краязнаўчага музея імя Е.Р. Раманава Віктар Анненкаў.