6 жніўня ў Рэспубліканскай мастацкай галерэі (Палац мастацтва) адкрыецца юбілейная выстава вядомага беларускага мастака-жывапісца і педагога Віктара Віктаравіча Нямцова — “Віктар Нямцоў. Млын часу”.

— Экспазіцыя прадставіць каля 150 жывапісных твораў, якія ахопліваюць асноўныя этапы творчага шляху майстра — ад ранніх работ да твораў апошніх гадоў, — распавялі нашай рэдакцыі ва ўстанове. — Віктар Нямцоў — прадстаўнік беларускай мастацкай школы другой паловы XX — пачатку XXI стагоддзя, творчасць якога на працягу дзесяцігоддзяў звязана з асэнсаваннем беларускага пейзажу, гісторыка-культурнай спадчыны і архітэктурных вобразаў роднай краіны.

Мастак нарадзіўся 8 верасня 1941 года. У 1965 годзе скончыў Мінскае мастацкае вучылішча імя А. К. Глебава, у 1972 годзе — Беларускі дзяржаўны тэатральна-мастацкі інстытут. З 1972 года Віктар Нямцоў удзельнічае ў рэспубліканскіх, усесаюзных і міжнародных выставах, з 1978 года з'яўляецца членам Беларускага саюза мастакоў.

Асаблівае месца ў творчасці Віктара Нямцова займае тэма беларускіх вадзяных млыноў. На працягу амаль трыццаці гадоў мастак звяртаўся да гэтага своеасаблівага сімвала адыходзячай эпохі, ствараючы работы, у якіх архітэктура, прырода і гістарычная памяць злучаюцца ў адзіны мастацкі вобраз.

— Млын у творах Нямцова — не толькі архітэктурны аб'ект. Гэта вобраз часу, руху і памяці, своеасаблівы пункт перасячэння чалавека, прыроды і гісторыі. У старадаўніх млынах мастак бачыць частку знікаючай народнай спадчыны, а ў навакольных пейзажах — непаўторную атмасферу беларускай зямлі, перадусім Палесся, — заўважылі арганізатары. — Менавіта таму назва юбілейнай выставы — “Млын часу” — набывае асаблівае сэнсавае значэнне. Яна адначасова звяртаецца да шматгадовай працы мастака над адным з галоўных цыклаў яго творчасці і да самой прыроды мастацтва Віктара Нямцова, у якім мінулае працягвае жыць у сучаснасці.

Экспазіцыя дазволіць прасачыць мастацкую эвалюцыю майстра і ўбачыць, як на працягу дзесяцігоддзяў змяняліся яго погляд на беларускі пейзаж, пластычная мова і спосабы асэнсавання гісторыка-культурнай прасторы краіны.

Разам з творамі цыкла “Беларускія млыны” на выставе прадстаўлены пейзажы, архітэктурныя матывы і работы, звязаныя з гістарычнай спадчынай Беларусі. У сукупнасці яны ствараюць маштабны мастацкі партрэт краіны – яе прыроды, вёсак і гарадоў, помнікаў архітэктуры і тых фрагментаў мінулага, якія паступова знікаюць з паўсядзённага жыцця, але захоўваюцца ў памяці і мастацтве.

Юбілейная экспазіцыя становіцца не толькі рэтраспектывай творчасці Віктара Нямцова, але і своеасаблівым разважаннем пра час, памяць і захаванне культурнай спадчыны.

Сёння творы мастака дазваляюць па-новаму зірнуць на звыклыя матывы беларускага пейзажу і ўбачыць у іх дакумент эпохі, эмацыянальную гісторыю месца і сведчанне беражлівых адносін аўтара да культурнай памяці сваёй краіны.

Выстава “Віктар Нямцоў. Млын часу” запрашае гледачоў здзейсніць падарожжа праз дзесяцігоддзі творчасці мастака і ўбачыць Беларусь вачыма майстра, для якога пейзаж становіцца прасторай памяці, а знікаючы архітэктурны вобраз – сімвалам бесперапыннага руху часу. Будзе працаваць да 18 жніўня.

Служба інфармацыі “К”