На тыдні 90-гадовы юбілей адзначыла легендарная асоба, чыё імя стала сінонімам айчыннага харэаграфічнага мастацтва, — Валянціна Гаявая. Народную артыстку Беларусі павіншаваў Кіраўнік дзяржавы.

“Ваш жыццёвы і творчы шлях з’яўляецца сапраўдным прыкладам высокага служэння любімай справе і цэлай эпохай у гісторыі харэаграфічнага ансамбля «Харошкі», — гаворыцца ў адрасе. — Яркія сцэнічныя вобразы, створаныя вамі, займаюць асаблівае месца ў айчыннай культурнай спадчыне. Глыбокай павагі заслугоўвае ваш уклад у выхаванне новых пакаленняў артыстаў, якія сваёй творчасцю праслаўляюць родную Беларусь”. Аляксандр Лукашэнка пажадаў Валянціне Гаявой доўгіх гадоў жыцця, моцнага здароўя, шчасця і дабрабыту.

Віншавальны адрас ад Прэзідэнта юбілярцы 22 ліпеня ўручыў міністр культуры Марат Маркаў. Кіраўнік ведамства таксама адзначыў, што талент Валянціны Іванаўны, яе адданасць мастацтву сталі прыкладам для многіх пакаленняў артыстаў. Міністр падзякаваў за шматгадовае служэнне айчыннай культуры, неацэнны ўнёсак у захаванне нацыянальных традыцый і пажадаў моцнага здароўя, душэўнага цяпла, радасці, дабрабыту і яшчэ многіх шчаслівых гадоў у коле родных, сяброў і гледачоў.

Народная артыстка Беларусі, якая падарыла свету ўнікальны ансамбль “Харошкі”, пераадолела дзіўны творчы шлях, поўны пошуку, вернасці справе і шчырай любові да народных традыцый. Гісторыя Валянціны Іванаўны пачалася ў расійскай глыбінцы, а прафесійнае станаўленне праходзіла ў Ленінградзе. Здавалася, лёс рыхтаваў сёлетняй юбілярцы кар’еру ў славутым хоры імя Пятніцкага, але жыццё распарадзілася інакш, звязаўшы творчую біяграфію гэтай выбітнай жанчыны з Беларуссю.

Пачаўшы з працы ў Магілёве, Валянціна Гаявая хутка заявіла пра сябе як таленавіты балетмайстар, а ў 1974-м атрымала карт-бланш на арганізацыю ўласнага калектыву пры Белдзяржфілармоніі. Так нарадзіліся “Харошкі” — Беларускі дзяржаўны акадэмічны заслужаны харэаграфічны ансамбль стаў візітоўкай краіны.

Амаль 50 гадоў Валянціна Іванаўна была душой і сэрцам калектыву. Яна не проста ставіла танцы — стварала цэлыя сусветы. У яе рэпертуары каля 80 работ — ад кранальных лірычных замалёвак да бліскучых, напоўненых народным гумарам нумароў. Кожная праграма, ці то “Полацкі сшытак”, ці то “Тураўская легенда”, — вынік карпатлівай даследчай працы.

Валянціна Гаявая асабіста аб’ездзіла ўсю Беларусь, збіраючы па крупінках этнаграфічную спадчыну: углядалася ў рухі сельскіх танцораў, вывучала старадаўнія касцюмы і нават шукала рэдкія музычныя інструменты па свеце, каб вярнуць іх да жыцця на сцэне. Падыход Валянціны Іванаўны заўсёды адрозніваўся бескампраміснасцю. Гэты чалавек — строгі настаўнік, які адбіраў у трупу толькі самых таленавітых і верных мастацтву артыстаў. Такая патрабавальнасць дазволіла “Харошкам” ператварыцца ў сапраўдны нацыянальны брэнд, які з трыумфам прымалі на самых прэстыжных сцэнах планеты.

Сёння, разважаючы над маштабам спадчыны Валянціны Гаявой, разумееш: яна не проста захавала народны танец, а ўдыхнула ў яго новае жыццё, зрабіўшы сапраўдным мастацтвам, зразумелым і блізкім кожнаму. Яе юбілей — свята не толькі для прыхільнікаў ансамбля, але і для ўсёй айчыннай культуры, якую легендарны харэограф узбагаціла сваім талентам, энергіяй і бясконцай адданасцю беларускай зямлі.

Служба інфармацыі “К”