З 18 красавіка па 13 мая ў Нацыянальным мастацкім музеі Рэспублікі Беларусь будзе экспанавацца выстава “Чарнобыль: 40 гадоў сузірання”.

У ноч на 26 красавіка 1986 г. адбылася аварыя на Чарнобыльскай атамнай электрастанцыі. З таго часу мінула 40 гадоў. Мы назіраем наступствы аварыі не толькі на ўзроўні выпаленай зямлі і пакінутых гарадоў, але і ў самай глыбіні чалавечага духу. Гэтыя сорак гадоў ператварылі гістарычную дату ў сакральную дыстанцыю, якая дазволіла нам перайсці ад жаху да засяроджанага ўзірання ў “чорную быль” нашай гісторыі. Гэтае сузіранне – спроба ўсвядоміць, як за чатыры дзесяцігоддзі горыч выпрабавання ператварылася ў ціхую, але нязломную сілу, даказваючы, што там, дзе розум бачыць толькі тлен, дух знаходзіць шлях да ператварэння і вечнасці.

Экспазіцыйны рад прадстаўлены творамі жывапісу, графікі, скульптуры, дэкаратыўна-прыкладнога мастацтва знакавых майстроў і аб’яднаны агульнай лініяй біблейскага апакаліптычнага вобраза “Зоркі Палын” з Адкрыцця Іаана Багаслова.

Выстава жывапісу, графікі і скульптуры беларускіх мастакоў XX–XXI стагоддзяў “Чарнобыль: 40 гадоў сузірання” створана на аснове работ са збораў Нацыянальнага мастацкага музея Рэспублікі Беларусь, Музея гісторыі горада Мінска, фондаў Беларускага саюза мастакоў і прыватных калекцый.

Адрас: г. Мінск, вул. Леніна, 20, пераходная галерэя.

Аляксандра ЧЭЧАТ і Анастасія МЯНЬКОЎСКАЯ, куратары выставы,
малошыя навуковыя супрацоўнікі аддзела беларускага мастацтва XX–XXI ст.