Ужо цягам 55 гадоў жыхароў аграгарадка і вакольных вёсак збірае ва ўтульнай атмасферы Маісееўшчынскі сельскі клуб у Барысаўскім раёне. Сюды з задавальненнем прыходзяць і дзеці, і дарослыя: загадчыца ўстановы Наталля Вевер імкнецца для ўсіх арганізаваць цікавы і карысны вольны час. 

ВЕДЫ — У СПРАВУ 

Наталля Пятроўна — кіраўнік новы, але яна вельмі паважае культурную спадчыну, якая дасталася ад папярэднікаў. Добрых традыцый закладзена нямала. Да сёння цёплым словам людзі ўспамінаюць загадчыцу клуба Зою Ізбавіцель: менавіта яна ў пачатку 1990х стала праводзіць у Маісееўшчыне дні вёскі і тэатралізаваныя народныя святы. Купалле ды іншыя адзначаліся шумна, з размахам, з захаваннем звычаяў. Наступны кіраўнік Віктар Цвяткоў прыйшоў у клуб з мясцовай сярэдняй школы, дзе выкладаў музыку. Увагу акцэнтаваў на мастацкай самадзейнасці, арганізаваў жаночы ансамбль, апрануў выканаўцаў у прыгожыя касцюмы — у той час пашыць такія было няпроста! У іх артысткі выступалі шмат гадоў. Нямала добрага паспелі зрабіць загадчыцы Наталля Друк і Таццяна Бабавоз. 

 Кіраўнік установы Наталля Пятроўна Вевер

Наталля Вевер па прафесіі прадавец, але жаданне займацца творчай працай падштурхнула да змены спецыяльнасці. Зараз Наталля Пятроўна вучыцца на рэ жысёра народных абрадаў і свят у Магілёўскім дзяржаўным каледжы мастацтваў. Набытыя веды ахвотна прымяняе на практыцы. 

— Па душы вяскоўцам аказаўся абрад “Багатая Каляда”, — распавядае загадчыца клуба. — Мы з дзецьмі пераапраналіся: і Дзядуля з Бабуляй у нас былі, і Цыганка, і Каза. Па вуліцах крочылі з каляднай зоркай. Шэсце атрымалася яркае, шумнае, вясёлае. Людзі ў вокны выглядвалі, з дамоў выходзілі, каб нас павітаць. Мінакі спыняліся, здымалі на тэлефоны, апладзіравалі, падпявалі ды пускаліся ў скокі разам з намі. Мы наведвалі і жыхароў паважнага ўзросту — віншавалі песнямішчадроўкамі і цешылі тэатралізаванай пастаноўкай. 

Удзельнічаем і ў іншых народных святах. Любім “Багач”, які ладзіць мясцовая школа. Вучні падыходзяць, разглядаюць, цікавяцца: як з гародніны такую кампазіцыю стварыць? Расказваем, паказваем — атрымліваюцца спантанныя, але захапляльныя і карысныя майстаркласы. 

ДАПЫТЛІВЫЯ І АКТЫЎНЫЯ 

Наталля Вевер у клубе адзіны культработнік. Але гэта не перашкаджае ёй быць годным арганізатарам. Дэкаратыўнапрыкладным мастацтвам юныя госці ўстановы займаюцца ў гуртку “Умелыя ручкі”. “Наш край” далучае дзяўчынак і хлопчыкаў да краязнаўства: яны збіраюць інфармацыю аб роднай вёсцы і найбліжэйшых населеных пунктах, аб паважаных людзях і цікавых прафесіях. Школьнікі актыўна прычыняюцца да патрыятычных акцый, ладзяць віншавальныя імпрэзы для пажылых людзей у гонар дзяржаўных свят, упарадкоўваюць тэрыторыю каля помніка “Журботная маці”. 

Дзецям у клубе заўсёды цікава!

Дзеці, якія знаходзяцца ў сацыяльна небяспечным становішчы, наведваюць экалагічнае аматарскае аб’яднанне. 

— Яны добрыя, працавітыя. На жаль, так атрымалася, што ўмовы жыцця ў гэтых хлопчыкаў і дзяўчынак складаныя, — тлумачыць Наталля Вевер. — З розных вёсак прыязджаюць на ўрокі ў школу, а потым — да нас, у клуб. З задавальненнем! Разам даследуем навакольны свет, флору і фаўну, вучымся разумна абыходзіцца з бытавым смеццем і ў цэлым паважліва ставіцца да прыроды. Мы прыбіраем прылеглы лес, а яшчэ разбілі клумбы, пасадзілі ніцыя вербы. Вырастуць — атрымаецца прыгожая загарадзь, а заадно і матэрыял для лозапляцення будзе пад рукой. 

Аматарскае аб’яднанне “Разам весялей” у клубе стварылі, калі ўстанове выдзелілі настольныя гульні. Яны аказаліся запатрабаванымі — працэс займальны, шмат магчымасцей для камандных спаборніцтваў: “Ваша лато”, “Манаполія”, “Капітал”, шашкі і шахматы. Ды і гульнявы пакой даступны цэлы дзень. Юныя наведвальнікі ахвотна ўдзельнічаюць у квэстах і дыскусіях на розныя тэмы, а летам шмат часу праводзяць на свежым паветры. Даганялкі і хованкі, класікі, пошук скарбаў, казакіразбойнікі… 

Папулярныя ў дзяцей гадзіны творчасці, падчас якіх дзяўчынкі і хлопчыкі набываюць карысныя навыкі. Напрыклад, плятуць кілімкі і лепяць з гліны. Яшчэ адно цікавае традыцыйнае мера прыемства — старшакласнікі праводзяць экскурсіі па экспазіцыі работ мясцовых майстрых, размешчанай у кутку сялянскага побыту. Аматараў павесяліцца на танцпляцоўцы збірае моладзевая дыскатэка “Без жартаў”. Паслуга платная, што для сельскага клуба істотна. 

З ПАВАГАЙ ДА ТРАДЫЦЫЙ 

Пра дарослых ва ўстанове таксама не забываюцца. Аматарскае аб’яднанне “Суразмоўніцы” сабрала жанчын, якія захапляюцца творчасцю, ведаюць народныя звычаі, гатуюць беларускія стравы. Кабеты разам адзначаюць святы ў адпаведнасці з мясцовымі традыцыямі, спяваюць, дзеляцца рэцэптамі, вядуць душэўныя размовы за кубачкам гарбаты з траў, якія самі ж і нарыхтоўваюць. Яшчэ ўдзельніцы аб’яднання ўспамінаюць добрым словам старажылаў, якія пакінулі багатую культурную спадчыну. 

Шмат ахвочых прыходзіць на майстаркласы па стварэнні народных лялек. Завітваюць і дзеці, і дарослыя. Наталля Пятроўна расказвае пра паходжанне лялькі, яе месца ў жыцці продкаў, пра нагоды, з якіх яе рабілі. Пазнавальна! Кіраўніца і сама наведвае заняткі па розных відах дэкаратыўнапрыкладнога мастацтва, якія ў Барысаве, у Цэнтры традыцыйнай культуры і раённым Цэнтры народнай творчасці, праводзяць вопытныя майстры. 

Падчас Тыдня бацькоўскай любові

— Па-вашаму, якая асноўная задача сельскага клуба? — цікаўлюся ў Наталлі Вевер. 

— Занятасць дзяцей і падлеткаў, арганізацыя карыснага вольнага часу для людзей рознага ўзросту, іх эстэтычнае выхаванне, — тлумачыць Наталля Пятроўна. — Імкнуся прыдумляць нешта новае, здзіўляць. Гэта няпроста: нашы сучаснікі, асабліва малодшае пакаленне, распешчаны забаўкамі анлайн. Таму хочацца паказваць рэальнае жыццё, далучаць да творчасці, аб’ядноўваць добрымі справамі, вучыць людзей шанаваць, захоўваць і развіваць культурныя традыцыі роднага краю. 

Святлана ЧЭКАЛАВА 

Фота з архіва клуба